Dadolin: LARAN METAN.

 Iha notísia o ko’alia ho lian mamar

Halo ema barak laran monu tan la sadar

Maibé o nia prátika bárbaru liu salazar;

Rai bokur Maliana la fó ona isin ba hare iha natar

Rai subur sira la fó ona fulin ba batar natarbora 

Tan kadalak oan sira ne’ebé sulin la nakfilak sai we inan

Hodi harahun fatuk maksatan be dalan;

LARAN METAN!

O dehan ami mak masin no naroman rai ne’e nian

Tansa, tansa o mai hadau fitun-tasi husi ami liman?

Konfiansa ne’e sei mihis haree ba uma be o harahun

Ami fo ona ukun, mas ulun sei “LASAMA”

Uma knua ba hatutan moris o mai sobu ho instrumentu poderozu

Uza forsa o mai ameasa no hamta’uk ami, ami, sei la hakru’uk tan ba o iha kada minutu, maske ibun ne’e o mai suku;

Iha diskursu o sempre hosu “todas as crianças são o futuro do estado”.

Hei! Liurai sem croa…oinsa labarik sira bele iha futuru karik sira nia uma ohin o mai sobu?

O hadau hotu sira nia haksolok iha fulan inísiu, O hamonok sira lian ho poder no lei repressivu 

Iha kada espasu mak sira hakat o sempre ameasa sira ho Kro’at.

Karik loron aban sira lakon hamnasa dalaruma ohin o hafo’er sira nia esperansa;

Povu Maubere tomak

Hamenus o-nia laran Metin ba ema sira be laran metan

Tan ibun tutun bele fó ba o maluk kabun-kidun ba ema seluk

Kadoras no haksolok sei la mai tanba sira nia bosok;

Rai loron komesa badak ba dadauk

Konfiansa mós komesa mamuk 

Kontra laran metan ita sei la hakru’uk;

Rezisténsia para sempre lalika ta’uk ho o mate, 

Tan loron ohin o sei resiste ne’e o nia sorte, se lialoos bele oho sira, husik sira mate! 

Hakerek na’in: Lorico

Díli, 24-01-2025